សៀមរាប៖ ការសម្តែងសិល្បៈបុរាណច្រើនប្រភេទ បានលេចឡើងក្នុងព្រឹត្តិការណ៍រំលឹកគុណអង្គរ ដែលមានការចូលរួមសម្តែងដោយសិល្បករ-សិល្បការនីជាច្រើនរូប។
បន្ទាប់ពីពិធីបើកព្រឹត្តិការណ៍រំលឹកគុណអង្គរ នៅព្រឹកថ្ងៃទី១៤ ខែធ្នូ ឆ្នាំ២០២២ មកទទួលបានការនិមន្ត និងអញ្ជើញចូលរួមពីថ្នាក់ដឹកនាំសំខាន់ៗជាច្រើនរូប និងភ្ញៀវទេសចរជាតិ និងអន្តរជាតិយ៉ាងច្រើនកុះករ។
នាថ្ងៃទី១នៃព្រឹត្តិការណ៍រំលឹកគុណអង្គរ ក្រៅពីពិធីសាសនាក៏មានការសម្ដែងល្ខោនទំនើបចម្រុះឈុតអរិយភាពនៃរាជកាលព្រះបាទជ័យវរ្ម័នទី៧ របាំបុរាណនិងប្រណៃណី ការសម្ដែងចាប៉ីដងវែងច្រៀងឆ្លើយឆ្លងគ្នា ព្រមទាំងការសម្ដែងបទចម្រៀងរបស់សិល្បករ សិល្បការិនីកម្ពុជា ជាពិសេសការសម្ដែងក្បាច់គុន និង ល្បុក្កតោខ្មែរ។
គួរបញ្ជាក់ដែលថា ព្រឹត្តិការណ៍រំលឹកគុណអង្គរនឹងប្រារព្ធរយៈពេល៣ថ្ងៃ ពីថ្ងៃទី១៤-១៦ ខែធ្នូហើយនាពេលល្ងាចថ្ងៃទី១៤នេះ នឹងមានកម្មវិធីអាយ៉ៃឆ្លើយឆ្លង សម្តែងដោយលោក ព្រហ្ម ម៉ាញ និងការបញ្ចាំងភាពយន្តឯកសារអំពីអង្គរ ដែលមានទីតាំងនៅបរិវេណព្រះលានជល់ដំរី នៃក្រុងអង្គរធំ អាចចូលរួមទស្សនាដោយសេរី៕